COP31-ə ev sahibliyi edəcək Türkiyə çərşənbə axşamı ölkələri qlobal enerji istehlakında elektrik enerjisinin payının artırılması hədəfini konfransın yekun sazişinin mərkəzinə qoymağa çağıracaq. Bu təşəbbüs, emissiyaların azaldılmasına çox az töhfə verə biləcəyi ilə bağlı tənqidlərə məruz qalır.
24media.az Reuters-ə istinadən xəbər verir ki, bazar ertəsi Türkiyənin Aralıq dənizi sahilindəki Antalya şəhərində başlayan və iki həftə davam edəcək BMT konfransından əvvəl Türkiyə hökumətlərə bir öhdəlik təklif edib. 2035-ci ilə qədər qlobal iqtisadiyyatın 35%-ni (hazırkı təxminən 20%-dən fərqli olaraq) elektrikləşdirmək.
Məsələdən xəbərdar olan bir şəxsin verdiyi məlumata görə, Türkiyə hazırda bu hədəfin danışıqların yekun sənədinə daxil edilməsi üçün daha geniş dəstək toplamağa çalışır.
Türkiyənin COP31 üzrə sədri Murat Kurumun mətbuat katibi şərh vermək barədə sorğuya cavab verməyib.
Bu hədəfin məqsədi qalıq yanacaqla işləyən nəqliyyat vasitələri, sobalar, qazanlar, mətbəx plitələri və istixana qazı buraxan digər avadanlıqlardan imtina prosesini sürətləndirmək və bununla da planetin istiləşməsinə səbəb olan emissiyaları azaltmaqdır.
Lakin iqlim fəalları və ölkədəki kömür mədənlərindən birinin yaxınlığında yaşayan bəzi kənd sakinləri bu öhdəliyi tənqid edirlər. Səbəb isə odur ki, sənəd əlavə elektrik enerjisinin məhz aşağı karbonlu mənbələrdən əldə edilməsini tələb etmir.
Parisdə yerləşən və karbon emissiyalarının uçotu ilə məşğul olan "Greenly" şirkətinin baş direktoru Aleksis Normand bildirib: "Əgər enerji şəbəkəsi 'təmiz' deyilsə, elektrifikasiya emissiyaları aradan qaldırmır; sadəcə olaraq, onları nəqliyyat vasitəsinin egzoz borusundan elektrik stansiyasının bacasına köçürür".
Aygül Alıyeva
