Nəhayət ki, Marsda həyatın izlərini axtarmaq üçün ən uyğun bölgə seçilib. Alimlər bu prosesdə metan qazının izlənməsinin əhəmiyyətli olduğunu düşünürlər. Marsın şimal yarımkürəsində yerləşən geniş bir düzənlik olan Acidalia Planitia həyat izlərini araşdırmaq üçün ən əlverişli bölgə kimi qiymətləndirilib.
Uzun zamandır ki, Marsda metan qazının mövcudluğu alimləri təəccübləndirir. Səthdəki nəzarətçi robotlar metan səviyyələrində mövsümi dəyişikliklər müşahidə etsə də, orbitdəki peyklər bu molekula aid güclü dəlillər tapmayıb. Bu, həyatın müəyyən şəraitdə mövcud ola biləcəyinə dair təsdiqlənməmiş, lakin maraq doğuran bir ipucu yaradır.
Bununla belə, Mars ümumən yaşayış üçün əlverişli deyil. Səth temperaturu adətən sıfırın çox altında olur, atmosfer demək olar ki, yox səviyyəsindədir və planet davamlı olaraq kosmik və Günəş radiasiyasına məruz qalır.
Keçmişdə Marsda okeanların və daha isti iqlimlərin mövcud olmasına baxmayaraq, bu gün səthdə və ya onun yaxınlığında canlı orqanizm tapmaq ehtimalı çox aşağıdır.
Yer planetindən ilhamlanan araşdırmalar
Alimlər Marsdakı həyat ehtimalını qiymətləndirmək üçün Yerdəki oxşar mühitləri öyrənirlər. Yer üzündə həyat atmosferin ən üst qatlarından yer qabığının kilometrlərlə dərinliyinə qədər hər yerdə yayılmışdır.
Xüsusilə, hidrogenlə qidalanıb tullantı məhsulu kimi metan istehsal edən və "metanojenlər" adlanan birhüceyrəli orqanizmlər Marsdakı həyat ehtimalları arasında güclü namizəd hesab olunur.
Astrobiology jurnalında dərc edilən yeni bir araşdırmada tədqiqatçılar Yerdəki Marsa bənzər mühitləri araşdırıb. Bu mühitlərdən bəziləri bunlardır: Yer qabığındakı mikroskopik çatlar, buz təbəqələrinin altındakı göllər, oksigenin az olduğu və həddindən artıq duzlu dərin dəniz hövzələri.
Alimlər bu şəraitdə yaşayan metanojenlərin xüsusiyyətlərini təhlil edərək Mars mühitinə ən yaxın olanlarını müəyyən ediblər.
Marsda həyat üçün ən əlverişli nöqtə
Tədqiqatçılar metanojenlərin yaşaya biləcəyi maye suyun ola biləcəyi yerləri xəritələndirmək üçün Marsdakı məlumatları təhlil ediblər.
Nəticələrə görə, Marsın şimal yarımkürəsindəki Acidalia Planitia həyat axtarışı üçün ən əlverişli bölgədir. Lakin maye suyun yalnız 4,3 ilə 8,8 kilometr dərinlikdə ola biləcəyi güman edilir.
Tədqiqatçılar bu dərinliklərdəki temperatur, duzluluq, pH və hidrogen səviyyələrinin metanojenlərin Yer mühitində yaşaya bildiyi şəraitlə uyğun ola biləcəyini deyirlər.
Bu tapıntılar Marsda həyat axtarışında dərin qazıntıların aparılmasının vacibliyini göstərir.
Marsda həyatın olub-olmadığını dəqiq şəkildə müəyyən etmək üçün daha çox araşdırma və yeni texnologiyalar tələb olunur. Lakin Acidalia Planitia kimi bölgələrdə aparılacaq dərin qazıntılar Qırmızı Planetin həyat sirrini üzə çıxara bilər.
Mənbə: TRT Haber
Tərcümə etdi: Gülçin Abdullayeva
