Saç tökülməsi genetik, stress, qida çatışmazlığı və digər amillərin yaratdığı ümumi problemdir. Tez-tez saç kəsdirmək saçların uzanmasını sürətləndirir, stress saç tökülməsinə təsir etmir, saçın sağlamlığına zəmanət verən bahalı məhsullar, saçları isti su ilə təmizləmək daha yaxşıdır kimi yanlış fikirlər var.
Saç tökülməsi bir çox insanların ümumi problemidir. İnsanlar tez-tez daraqda və ya yastıqda çox tük gördükdə narahat olurlar. Saç tökülməsi, incəlmə və qırılma kimi saç problemləri müxtəlif faktorlardan qaynaqlana bilər. Bunlara genetika, hormonal dəyişikliklər, həddindən artıq stress, qida çatışmazlığı, düzgün saç baxımı rejiminə əməl edilməməsi, saç düzümü alətlərinin tez-tez istifadəsi, çirklənmə və alopesiya kimi tibbi vəziyyətlər daxildir. Saç tökülməsi və saça qulluq haqqında çoxlu yanlış fikirlər var ki, bu da asanlıqla çaşqınlıq və anlaşılmazlıqlara səbəb ola bilər.
Qısa saç kəsimi saçlarınızı sağlam edir?
Saçınızı qısa kəsdirmək, qırılan ucları bərpa etməyə və saçlarınızın daha sağlam və qalın görünməsinə kömək edə bilər. Bununla belə, saçlarınızın daha sürətli uzanmasına səbəb olmur. Saçlarınız uclarından deyil, köklərindən uzanır. Düzgün saç baxımı rejimini saxlamaq saçınızın böyüməsinə təsir göstərə bilər.
Stress saç tökülməsinə səbəb olurmu?
Həddindən artıq stress saçınıza zərər verə bilər. Yüksək stress səviyyələri Telogen effluvium kimi müxtəlif saç tökülmələrini artıra bilər. Bu halda saçlarınız erkən töküləcək. Həddindən artıq stress saç köklərini mənfi şəkildə zəiflədə bilər və saç tökülməsinə səbəb ola bilər. Dərin nəfəs məşqləri və meditasiya kimi zehinlilik təcrübələrinin köməyi ilə stress səviyyələrinizi idarə etmək vacib olur. Bu, saçınızın böyüməsini yaxşılaşdırmağa kömək edə bilər.
Sağlam saçlar üçün bahalı məhsullardan istifadə etmək əsasdırmı?
Daha yaxşı saçlara sahib olmaq üçün bahalı saç baxım məhsullarına ehtiyacınız yoxdur. Qiymət etiketindən asılı olmayaraq, ən yaxşı nəticələrə nail olmaq üçün saç tipinizə və məqsədlərinizə uyğun saça qulluq məhsulunun düzgün növünü seçmək vacibdir. İstifadə etdiyiniz saç baxım məhsulları saç tipinizə uyğun deyilsə, vəziyyətinizi pisləşdirə və saç tökülməsinə səbəb ola bilər.
İsti su saçları yaxşı təmizləyir?
Bəzi insanlar saçlarını yumaq üçün isti sudan istifadə edirlər. Təmiz baş dərisi üçün isti sudan istifadə ideyasını dəstəkləmək üçün heç bir elmi araşdırma yoxdur.
Saçınızı isti su ilə yumaq saçınıza zərər verə və ciddi qırılmalara səbəb ola bilər. Baş dərinizdəki təbii yağlara mənfi təsir göstərərək saçlarınızın həddindən artıq qurumasına səbəb ola bilər. Saçınızı yuyarkən həmişə soyuq və ya ilıq sudan istifadə edin.
Mənbə: NTV
Tərcümə etdi: Səma İsmayılova
