Çikaqodakı Sahə Təbiət Tarixi Muzeyinin alimləri, qədim Misirdə mumiyalanmış insanların sarğılarının altındakı qalıqları araşdıraraq, onların kimlikləri və ölümdən sonrakı həyata necə hazırlandıqları haqqında yeni məlumatlar əldə ediblər.
Sentyabr ayında əməkdaşlar, muzeydə sərgilənən 26 mumiyanı mobil CT skanerindən keçirmək üçün xüsusi hazırlanmış arabalarda aparıblar. Bu dağıdıcı olmayan texnologiya, mumiyaların və onların tabutlarının minlərlə rentgen şüaları ilə təhlil olunmasına imkan yaratdı. X-şüaları üst-üstə yığıldıqda, içəridəki skeletləri və artefaktları ortaya çıxaran 3D təsvirlər əldə edildi. Bu yeni araşdırmalar, misirlilərin 3000 ildən çox əvvəl tətbiq etdikləri meyitxana prosedurlarını və onların ölümdən sonrakı həyatda vacib hesab etdikləri şeyləri daha yaxşı anlamağa kömək edib.
Muzeyin antropologiya üzrə baş konservatoru JP Braun bildirib ki, skanların tamamlanması təxminən dörd gün çəkəcək. Lakin 3D təsvirlərin işlənməsi və təhlili üç ilə qədər vaxt tələb edə bilər. Bu skanlar, mumiyaları uzun illər qoruyub saxlamağın ən yaxşı üsulları haqqında məlumat verməklə yanaşı, hər bir mumiyalanmış misirlinin bütün xüsusiyyətlərini və şəxsi detallarını dərindən öyrənmək imkanı yaradır.
Field Muzeyində insan qalıqları kolleksiyalarının meneceri Stacy Drake bildirib ki, “Arxeoloji baxımdan tarixi həm ümumi perspektivdən, həm də tək bir şəxsin nöqteyi-nəzərindən araşdırmaq olduqca az rast gəlinən bir yanaşmadır. Bu, həmin insanların kim olduğunu daha yaxından öyrənmək üçün əla bir üsuldur. Yalnız onların yaratdıqları əşyalara və haqqındakı hekayələrə deyil, həm də həmin dövrdə yaşamış insanlara diqqət yetirmək imkanı yaradır".
Mənbə: CNN
Tərcümə etdi: Qüdrət Məmmədova
