"Çelsi"nin yarımmüdafiəçisi Enzo Fernandez klubdakı gələcəyi ilə bağlı səsləndirdiyi fikirlərə görə komandanın növbəti iki oyununu buraxmalı olacaq. Baş məşqçi Liam Rozenior argentinalı futbolçunun "qırmızı xətti keçdiyini" və bu qərarın klub daxili nizam-intizamı qorumaq üçün verildiyini bildirib.
Argentinalı yarımmüdafiəçi Enzo Fernandez oyun zamanı
BBC-Sports-un verdiyi məlumata görə, 25 yaşlı oyunçu müsahibəsində növbəti mövsüm Londonda qalıb-qalmayacağını bilmədiyini və İspaniyada yaşamaq istədiyini deyib. 107 milyon funt-sterlinqlik rekord transfer olan Fernandez "Port Vale" və "Mançester Siti" ilə qarşıdakı vacib matçlarda iştirak etməyəcək. Rozenior bu addımın rəhbərliklə ortaq qərar olduğunu vurğulasa da, qapıların futbolçunun üzünə tam bağlanmadığını qeyd edib.
Ulduz futbolçuların komandanın çətin dövrlərində bu cür qeyri-müəyyən açıqlamalar verməsi klub daxilindəki mühitə mənfi təsir göstərir. Məşqçinin bu qərarı, intizamın transfer məbləğindən daha önəmli olduğunu göstərən bir addımdır.
Fatimə Salmanlı
