İranda təhlükəsizlik qüvvələri ölkədə mümkün etiraz çağırışları fonunda sərt bəyanatla çıxış edərək xəbərdarlıq edib ki, hakimiyyətə qarşı küçələrə çıxan şəxslər ciddi tədbirlərlə üzləşə bilər.
Hərbi texnika üzərində dayanan silahlı İran hərbçisi, BBC
İran polisinin rəhbəri Əhməd-Rza Radan dövlət televiziyasına açıqlamasında bildirib ki, təhlükəsizlik qüvvələri ölkədə sabitliyi qorumaq üçün tam hazır vəziyyətdədir. Onun sözlərinə görə, etiraz aksiyalarına çağırış edən və ya belə aksiyalarda iştirak edən şəxslərə qarşı sərt addımlar atılacaq.
Radan deyib ki, təhlükəsizlik qüvvələrinin “barmaqları tətikdədir” və onlar istənilən təhlükəyə qarşı dərhal reaksiya verməyə hazırdırlar. O əlavə edib ki, küçələrə çıxaraq iğtişaş yaratmağa çalışan şəxslər “etirazçı deyil, düşmən kimi” qiymətləndiriləcək.
Bu açıqlama son günlərdə İran daxilində və xaricində edilən çağırışlardan sonra səsləndirilib. Bəzi xarici siyasətçilər iranlıları hakimiyyətə qarşı etirazlara qoşulmağa çağırıb.
İran hakimiyyəti isə bu cür çağırışları ölkənin daxili işlərinə müdaxilə kimi qiymətləndirir və bildirir ki, xaricdən təşviq edilən aksiyalar milli təhlükəsizlik üçün təhdid hesab olunur.
Son illərdə İranda müxtəlif sosial və siyasi səbəblərdən etiraz aksiyaları baş verib. Hakimiyyət bu aksiyalara qarşı geniş təhlükəsizlik tədbirləri tətbiq edib və bir çox hallarda nümayişlərin dağıdılması üçün güc strukturlarından istifadə olunub.
İnsan hüquqları təşkilatları isə bildirir ki, etirazların yatırılması zamanı çoxsaylı insanlar saxlanılıb və bəzi hallarda zorakılıq halları qeydə alınıb.
Mənbə: BBC News
Tərcümə etdi: Zəhra Məlikova
