Apple yeni MacBook Pro modellərini təqdim edib. M5 Pro və M5 Max çipləri ilə təchiz olunan noutbuklar daha sürətli Sİ (süni intellekt) performansı və 24 saata qədər batareya ömrü vəd edir.
Yeni M5 Pro və M5 Max çipləri ilə təchiz olunan MacBook Pro, Apple
Apple yeni 14 və 16 düymlük MacBook Pro modellərini təqdim edib. Şirkətin bildirdiyinə görə, cihazlar tamamilə yeni M5 Pro və M5 Max çipləri ilə təchiz olunub və əvvəlki nəsillə müqayisədə süni intellekt performansında 4 dəfəyədək artım təklif edir. Noutbuklar martın 4-dən sifarişə açıq olacaq, satışa isə martın 11-də çıxarılacaq.
Yeni modellər Apple-ın ən son M5 Pro və M5 Max prosessorları ilə təchiz edilib. Qeyd edilib ki, bu çiplər yeni CPU arxitekturası, hər qrafik nüvəsində neyron sürətləndirici və daha yüksək vahid yaddaş ötürmə qabiliyyəti sayəsində xüsusilə süni intellekt əsaslı iş axınlarında əhəmiyyətli performans artımı təmin edir. M5 Pro və M5 Max modelləri M1 seriyası ilə müqayisədə 8 dəfəyədək daha sürətli Sİ performansı vəd edir.
Yeni çiplər 18 nüvəyədək CPU (6 “super” nüvə və 12 performans nüvəsi) ilə gəlir və çoxaxınlı peşəkar iş yükləri üçün optimallaşdırılıb. M5 Pro 64GB-a qədər, M5 Max isə 128GB-a qədər vahid yaddaş dəstəkləyir. Yaddaş ötürmə qabiliyyəti müvafiq olaraq 307GB/s və 614GB/s təşkil edir.
Şirkət bildirir ki, yeni modellərdə SSD sürəti 2 dəfəyədək artırılıb. M5 Pro versiyası artıq 1TB, M5 Max isə 2TB başlanğıc yaddaş həcmi ilə təklif olunur. Batareya ömrü isə 24 saata qədərdir və cihaz 96W və ya daha güclü USB-C adapteri ilə 30 dəqiqəyə 50 faizə qədər sürətli enerji yığa bilir.
Yeni MacBook Pro, həmçinin Wi-Fi 7 və Bluetooth 6 dəstəyi verən Apple istehsalı N1 simsiz çipi ilə təchiz olunub. Cihazda üç ədəd Thunderbolt 5 portu, 8K dəstəkləyən HDMI, SDXC kart yuvası və MagSafe 3 mövcuddur. M5 Pro modeli iki, M5 Max isə dörd xarici yüksək keyfiyyətli monitor qoşmağa imkan verir.
Noutbuk 1600 nit pik HDR parlaqlığına malik Liquid Retina XDR ekran, 12MP Center Stage kamera, studiya keyfiyyətli mikrofonlar və altı dinamikli səs sistemi ilə gəlir. Yeni modellər kosmik qara və gümüş rəng seçimlərində təqdim olunur.
Cihazlar ən son macOS Tahoe əməliyyat sistemi ilə işləyir. Sistem yenilənmiş Spotlight, Apple Intelligence funksiyaları, Live Translation və digər məhsuldarlıq alətləri ilə təchiz edilib.
Apple bildirir ki, yeni MacBook Pro modelləri 45 faiz təkrar emal olunmuş materiallardan hazırlanıb və şirkətin 2030-cu ilə qədər karbon neytrallığı hədəfinə uyğun şəkildə istehsal edilib.
Mənbə: Apple
Tərcümə etdi: Nərmin Məmmədzadə
