Göz beş duyğu orqanımızdan biridir. Gözlərimiz sayəsində ətrafımızdan xəbərdar oluruq və hətta öyrəndiklərimizin 80%-ni görərək əldə edirik. Gözün görməsini təmin edən çoxlu hissələr var. Əsasən, görmədə rol oynayan bölgələr sırayla buynuz qişa, göz bəbəyi, iris, lens və tor qişadır.
Hər hansı bir obyektə baxdığımız zaman cisimdən əks olunan işıq, əvvəlcə, buynuz qişaya gəlir. Buynuz qişa gözün ön hissəsində olan günbəzşəkilli, şəffaf təbəqədir. Gözün diqqətini cəmləməsinə kömək etmək üçün gözə gələn işığı bükür.
Buynuz qişa tərəfindən əyilmiş işığın bir hissəsi göz bəbəyinə daxil olur. Göz bəbəyi iris kimi tanınan gözün rəngli sahəsinin ortasındakı qara hissədir. İris gözdəki əzələlərdən istifadə edərək göz bəbəyini genişləndirə və daralda bilər. Beləliklə, o, göz bəbəyindən keçən işığın miqdarına nəzarət edir.
Göz bəbəyindən keçən işıq gözün içindəki linza tərəfindən ikinci dəfə bükülür və retinaya çatdırılır. Gözün arxasındakı tor qişada milyonlarla işığa həssas sinir hüceyrəsi var. İşıq tor qişada sinir hüceyrələrini stimullaşdırdıqda müəyyən vizual mesajlar əmələ gəlir. Bu mesajlar milyonlarla sinir lifindən ibarət olan optik sinir vasitəsilə beyindəki vizual məlumatları oxuyan və emal edən oksipital hissəyə ötürülür.
Beyin optik sinirdən əldə etdiyi bu məlumatdan istifadə edərək iki gözdən gələn görüntüləri birləşdirərək tək bir görüntüyə çevirir. Oksipital lobdakı vizual korteks baxdığımız obyektin nə olduğunu anlamağa imkan verir.
Mənbə: Bilim Genç Tübitak
Tərcümə etdi: Aydan Qasımova
