Lüks moda brendi "Alexander McQueen" satışların azalması fonunda İtaliyadakı əməkdaşlarının təxminən üçdə birini ixtisar etmək qərarı verib. Bu addım hazırda lüks moda sektorunun üzləşdiyi ümumi çətinlikləri açıq şəkildə əks etdirir.
Şirkətə yaxın mənbələrin bildirdiyinə görə, qərar qlobal iqtisadi qeyri-sabitlik, istehlakçı tələbatının zəifləməsi və lüks məhsullara marağın azalması ilə bağlıdır. Son dövrlərdə alıcılar daha ehtiyatlı davranır, bu isə yüksək qiymətli brendlərin satış göstəricilərinə birbaşa təsir edir.
Mütəxəssislər qeyd edirlər ki, "Alexander McQueen"nin atdığı bu addım təkcə bir brendə aid deyil. Bir çox lüks moda evləri xərclərin azaldılması, struktur dəyişiklikləri və bazara uyğunlaşma strategiyalarını yenidən nəzərdən keçirir.
Baş verənlər göstərir ki, uzun illər sabitlik və yüksək gəlirlərlə seçilən lüks moda sektoru hazırda ciddi transformasiya mərhələsindən keçir və bu proses yaxın dövrdə digər tanınmış brendlərə də təsir göstərə bilər.
Mənbə:reuters.com
Tərcümə etdi:Şehrin Musayeva
