Həyatdan nə istəyirsiniz? Sizcə, sizi ən çox nə xoşbəxt edəcək? Bu sualı kiməsə versəniz, yəqin ki, o, pul, ev, maşın, böyük və dəbdəbəli bir tətil və sair istədiyini deyəcək. Bəlkə də, bahalı zinət əşyaları və hətta bir qayıq belə istəyə bilərlər.
Bütün bunlar məntiqlidir; biz adətən xoşbəxtliyi həyatdakı daha böyük, "daha yaxşı" şeylərlə əlaqələndiririk - bu, əmlak, bir hadisə və ya nailiyyət ola bilər. Lakin reallıq budur ki, xoşbəxtlik başqa şeylərdən - gündəlik işlərdən və həyatımızda daim yaşanan, amma çox vaxt başqa bir şeyin baş verməsini və ya gəlməsini gözlədiyimiz üçün diqqət etmədiyimiz anlarda da gələ bilər.
Xoşbəxt ola biləcəyimiz kiçik şeylər, əlbəttə, var və bunlar istənilən bir şey ola bilər. Buna səhər hamıdan əvvəl oyanıb qəhvəmizi dadmaq, günəşin dərinizdə istiliyini hiss etmək, dostumuzla və ya sevdiyimiz insanla ürəkdən söhbət etmək, ləzzətli bir yeməkdən zövq almaq və sair daxildir. Bunlar ilk baxışda çox əhəmiyyətli olmayan adi şeylər kimi görünə bilər, lakin, əslində, çox şey ifadə edir.
Ani həzz almaq haqqında iki fərqli düşüncə mövcuddur – bəziləri bunun pis bir şey olduğunu düşünür və səbirli olmağı, hər şeyi dərhal əldə etməyi gözləməməyi öyrənməli olduğumuzu deyir. Digərləri isə ani həzzin xoşbəxtliyin açarı olduğunu düşünür.
Hər iki yanaşma üçün yaxşı səbəblər var, lakin xoşbəxt olmaq və bu yolda kiçik şeylərdən istifadə etmək məsələsində ani həzz çox məntiqlidir. Həqiqət budur ki, kiçik sevinclər ani həzz və dərhal məmnuniyyət gətirir, uzunmüddətli məqsədlər və ya arzular üçün isə bunu söyləmək çətindir, çünki onlar çox vaxt və səylə həyata keçirilir.
Kiçik həzzlər əhvalımızı dərhal yaxşılaşdırmaq və rifahımızı artırmaq üçün mövcuddur. Bu kiçik həzzlər sevdiyimiz rahatlıq gətirən yeməkləri yemək, gözəl bir mahnıya qulaq asmaq və ya yaxşı bir kitabın növbəti fəsilini oxumaq kimi şeylər ola bilər. Bu anlar gündəlik həyatın stresindən bizi dərhal azad edir.
Həyatın kiçik anlarına diqqət yetirmək çox vaxt gözardı etdiyimiz bu anların bizə verdiyi xoşbəxtliyi dərk etməyimizə kömək edir. Gündəlik həyatımızda kiçik, lakin qiymətli təcrübələri daha çox qiymətləndirərək daha yaxşı rifah halı və münasibətlər qura bilərik. Bu sadə, lakin dərin anlar bizə yalnız anlıq sevinc gətirməkdə deyil, həm də insanlarla əlaqə qurmaq, birgə vaxt keçirmək imkanı verir. Beləliklə, həyatımızı daha mənalı və xoşbəxt edəcək dəyişikliklər etmək böyük hədəflərə gedən yolda ən vacib addımlardan biri ola bilər.
Mənbə: Zenluxco
Tərcümə etdi: Arzu Qafarova
