Jurnalistika dünyadakı məşhur peşələrdən biridir, onun tədris olunmasında bir çox incə məqamlar mövcuddur. Bu kimi işlər isə jurnalistika məktəblərinə həvalə olunur. Jurnalistika məktəbləri dünya miqyasında xəbərlərin hazırlanması, media etikası, xəbərlərin araşdırılması və digər jurnalistika sahələrində təhsil verən təsisatlardır. Gəlin, bu məktəblərə nəzər salaq:
Kolumbiya Universiteti - Jurnalistika Məktəbi (Columbia University Graduate School of Journalism)
Kolumbiya Universitetinin Jurnalistika Məktəbi New York şəhərində yerləşir. Bu məktəb ABŞ-nin ən tanınmış və keyfiyyətli jurnalistika proqramına sahibdir. Məktəb müasir jurnalistikanın müxtəlif növlərini, yanaşmalarını öyrədən proqramları ilə məşhurdur. Bura, həmçinin Pulitser mükafatlarının verildiyi yer olaraq da məşhurdur. Pulitser ədəbiyyat, jurnalistika, musiqi və teatr sahəsində xidməti olan şəxslərə verilən, dünyaca məşhur mükafatdır.
London Universiteti - Goldsmiths (Goldsmiths, University of London)
London Universitetinin Goldsmiths kolleci jurnalistika və media tədqiqatları sahəsində əhəmiyyətli yer tutur. Burada media analizlərinin aparılması prosesi tədris proqramının əsasını təşkil edir.
Sorbon Universiteti - Jurnalistika Məktəbi (University of Sorbonne, Paris)
Bu məktəb Fransanın Paris şəhərində yerləşir. Avropadakı jurnalistikanın inkişafına böyük tövhələr verib. Burada, dil və mədəniyyət baxımından fərqli yanaşmalar sayəsində jurnalistika geniş miqyaslı tədris olunur.
Əl-Cəzira Universiteti - Jurnalistika Məktəbi (Al Jazeera Media Institute)
Qatarın paytaxtı Dohada yerləşən Əl-Cəzira Media İnstitutu jurnalistika sahəsində müasir və qabaqcıl təlimlər həyata keçirir. Bu məktəb, xüsusən Orta Şərq və Şimali Afrika bölgəsindəki media peşəkarlılığının artırılmasına xidmət edir.
Missouri Universiteti - Jurnalistika Məktəbi (Missouri School of Journalism)
Bu məktəb uzun tarixə malik və tanınmış jurnalistika təhsil müəssisəsidir. Tədris binası ABŞ-nin Missouri ştatında yerləşir. Məktəb tələbələrə jurnalistikanın müxtəlif sahələrində geniş və davamlı təcrübə imkanı verir.
Nyu York Universiteti - Jurnalistika Məktəbi (New York University - Arthur L. Carter Journalism Institute)
Nyu York Universitetinin Arthur L. Carter Jurnalistika İnstitutu dinamik və əhatəli jurnalistika proqramları ilə tanınır. Bu məktəb, xüsusən beynəlxalq jurnalistika və multimedia istehsalı sahələrində güclü təlimlər təqdim edir. Hərtərəfli mütəxəsislərin yetişdirilməsində böyük rol oynayır.
Boston Universiteti- Jurnalistika Məktəbi (Boston University College of Communication)
Boston Universitetinin Kommunikasiya Kolleci jurnalistika və kommunikasiya sahəsində əhəmiyyətli proqramlar təqdim edir. Belə ki, onun təlim proqramlarında kommunikasiyanın jurnalistikadakı önəmi tələbələrə öyrədilir. Həmçinin jurnalistika praktikasının müxtəlif tərəfləri də burada tədris olunur.
Cronkite-Jurnalistika Məktəbi (Walter Cronkite School of Journalism and Mass Communication)
ABŞ-ın Arizona ştatında, Arizona Dövlət Universitetində yerləşir. Məktəb 1984-cü ildən fəaliyyət göstərir və jurnalistika və kütləvi kommunikasiya sahələrində keyfiyyətli təhsil verməyi hədəfləyir. Adını məşhur jurnalist Walter Cronkite-dən alır, bu da məktəbin jurnalistika dünyasında yüksək nüfuzunu və peşəkar prinsiplərə bağlılığını əks etdirir.
Hər birinin özünəməxsus cəhətlərinin olmasına baxmayaraq, onları birləşdirən əsas məqsəd mövcuddur. Belə ki, jurnalistika məktəbləri, dünya miqyasında jurnalistika təhsilinin inkişafında əhəmiyyətli rol oynayır. Onlar tələbələrə müasir jurnalistika təcrübələrini öyrətməklə yanaşı, media etikası, araşdırma metodları və xəbər təqdimatı sahəsində müxtəlif biliklər verir. Hər bir məktəb özünəməxsus proqramları və yanaşmaları ilə jurnalistika sahəsində peşəkarları yetişdirməkdə mühüm rol oynayır.
Hazırladı: Tahirə Bağırzadə
