Ev təmizliyi ilə bağlı tövsiyələrini sosial şəbəkədə paylaşan təmizlik həvəskarı Deniyıl Meyson mətbəxdə bakteriyaların ən çox toplandığı yerləri sadalayıb. “Daily Mail” onun fikirlərini sitat gətirir.
Meyson kir və infeksiyanın ilk mənbəyi kimi mətbəx şkafının tutacaqları və işıq açarlarını göstərdi. O izah etdi ki, insanlar ət kəsdikdən sonra bu əşyalara toxunur və sonra onları yumağı unudurlar. Həmçinin, onun sözlərinə görə, səthləri silən parça dəsmal və əskilərdə çoxlu sayda bakteriya toplanır. O, əskiləri gündəlik dezinfeksiyaedicidə islatmağı və dəsmalları təmiz olanlarla dəyişməyi tövsiyə etdi. Təmizlik həvəskarı qabların yuyulması üçün süngərlərdən tamamilə imtina etməyə çağırdı. Onun sözlərinə görə, rütubətli mühitə görə onlarda təhlükəli bağırsaq bakteriyaları çoxalır ki, onlardan xilas olmaq demək olar ki, mümkün deyil.
Meysonun xəbərdar etdiyi mətbəxdə başqa bir kirli yer lavabodur. Onun fikrincə, mətbəx santexnika bir çox bakteriyaların çoxalması üçün əlverişli mühitdir. “Lavabonun altında proteobakteriya adlanan bir qrup bakteriyanın üstünlük təşkil etdiyi mikrob koloniyaları tapıldı. Bu növə ciddi xəstəliklərə səbəb olan salmonella və E.coli kimi patogenlər daxildir”, - deyə təmizlik həvəskarı bildirib. O, lavabonun gündə bir neçə dəfə xüsusi təmizləyici və ya soda və sirkə ilə yuyulmasını tövsiyə etdi.
Bundan əlavə, Meyson soyuducudakı rəfləri mütəmadi olaraq sabunlu su ilə silməyə və hər iki aydan bir hərtərəfli təmizləmə aparmağa çağırdı. Adi soda, o deyir ki, xoşagəlməz qoxudan xilas olmağa kömək edəcək.
Mənbə: Lenta.ru
Tərcümə etdi: Günel Məmmədova
