Hörmüz boğazından nəqliyyatın uzun müddət dayanacağı təqdirdə Səudiyyə Ərəbistanı neft tədarükü üçün alternativ marşrut təklif edib.
Neft emalı zavodunun ərazisində texniki boru kəmərlərinin və qurğuların yanında dayanan xüsusi geyimli işçilər
24media.az AZƏRTAC-a istinadən xəbər verir ki, ölkə uzunmüddətli müştərilərinə aprel ayı üzrə neft daşımalarını Qırmızı dənizdə yerləşən Yanbu limanı vasitəsilə çatdırmağı təklif edib. Bildirilir ki, limana gedən boru kəmərinin daşıma imkanları məhdud olduğundan alıcılar aylıq tədarüklərinin yalnız bir hissəsini əldə edə biləcəklər.
Qeyd olunub ki, Yanbu limanı Qırmızı dənizə uzanan və gündə 5 milyon barel ötürmə gücünə malik boru kəməri ilə təchiz edilib. Buradan Asiya ölkələrinə göndərilən neft çatdırılma şərti ilə satılacaq və logistika “Saudi Aramco” tərəfindən təşkil ediləcək.
Məlumata görə, Yaxın Şərqdə gərginlik artdıqdan sonra “Saudi Aramco” Yanbu limanı vasitəsilə neft daşımalarını artırıb. Alternativ variant kimi isə neftin Fars körfəzi vasitəsilə çatdırılması göstərilir, lakin Hörmüz boğazının bağlanması bu marşrut üzrə tədarük riskini artırır.
Aylin Bayraməliyeva
