Azərbaycanda mülkiyyət hüquqlarının daha etibarlı qorunması və daşınmaz əmlakın dövlət ehtiyacları üçün alınması zamanı yaranan mübahisələrin qarşısını almaq məqsədilə mühüm qanunvericilik təşəbbüsü irəli sürülüb. Milli Məclisin plenar iclasında çıxış edən deputat Nurlan Həsənov, kompensasiyaların ödənilməsi prosedurunu kompleks şəkildə tənzimləyən yeni və müstəqil bir qanun layihəsinin hazırlanmasını zəruri hesab edir.
24media.az "Report"a istinadən xəbər verir ki, deputat əmlakın dövlət və ictimai ehtiyaclar üçün əldə edilməsi zamanı kompensasiyanın qabaqcadan və ədalətli ödənilməsi prinsiplərinin yeni sənəddə dəqiq əksini tapmasını təklif edib. N. Həsənov qeyd edib ki, Konstitusiya Məhkəməsi Plenumunun 2020-ci il 22 may tarixli qərarında da bu istiqamətdə qanunvericiliyin təkmilləşdirilməsi ilə bağlı Milli Məclisə müvafiq tövsiyələr verilib. Beynəlxalq təcrübə də göstərir ki, bir çox ölkələrdə bu cür həssas məsələlər ayrıca normativ-hüquqi aktlarla tənzimlənir.
Təklifdə həmçinin Şəhərsalma və Tikinti Məcəlləsinin normalarına toxunulub. Bildirilib ki, dövlət ehtiyacları ilə bağlı olmayan tikinti işləri zamanı mülkiyyətçilərin iradəsi və hüquqları daha dəqiq qorunmalı, tikinti fəaliyyətinin şərtləri təkmilləşdirilməlidir. Bu qanun layihəsinin qəbulu gələcəkdə həm vətəndaşların mülkiyyət toxunulmazlığını gücləndirə, həm də dövlət layihələrinin icrası zamanı hüquqi şəffaflığı təmin edə bilər.
Arzu Qafarova
