MLS klubu New York City FC hücumçu Alonso Martinezin Kosta-Rika millisində olarkən dizindən zədə aldığını açıqlayıb. ABŞ mətbuatının məlumatına görə, 27 yaşlı futbolçu məşq zamanı ön çarpaz bağlarını (ACL) qoparıb.
"Martinez daha ətraflı müayinə üçün Nyu-Yorka qayıdıb. Gələcək günlərdə əlavə məlumat veriləcək. Klub olaraq ona tezliklə sağalmağı arzulayırıq", – deyə NYCFC-nin bəyanatında bildirilib.
Zədənin ağırlığına görə Martinez 23 noyabrda keçiriləcək Şərq Konfransının yarımfinalında "Philadelphia Union"la oyunu buraxa bilər.
Martinez bu mövsüm NYCFC-nin əsas qol silahına çevrilib – 30 oyunda (29 start) 17 qolla komandasının bombardiri olub. Pley-off mərhələsində "Charlotte FC"yə qarşı isə daha iki qol vurub.
Onun yoxluğu Kosta-Rika millisinin 2026-cı il Dünya Çempionatına vəsiqə uğrunda mübarizəsinə də ciddi təsir göstərə bilər. Martinez millidə indiyədək 30 oyunda 8 qol vurub.
Mənbə: Reuters
Tərcümə etdi: Mələk Nəsirli
