Beynəlxalq Futbol Federasiyası (FIFA) 2029-cu ildən etibarən Klublararası Dünya Çempionatını hər iki ildən bir keçirmək imkanını müzakirə edir. Yeni təkliflərə əsasən, turnirin hazırkı 32 komandalı formatı 48 komandaya qədər genişləndirilə bilər.
Məsələ ilə bağlı məlumatı “The Guardian” yayıb. Qeyd olunur ki, FIFA bu dəyişikliklə klub futbolunun daha geniş şəkildə təmsil olunmasını və daha çox ölkədən komandaların yarışa qoşulmasını hədəfləyir.
FIFA prezidenti Canni İnfantino bildirib ki, əsas məqsəd qlobal futbol ailəsini bir araya gətirmək və azarkeşlərə daha çox yüksək səviyyəli oyun təqdim etməkdir. Onun sözlərinə görə, yeni format klublara həm idman, həm də maliyyə baxımından əlavə üstünlüklər verəcək.
Mövzu futbol ictimaiyyətində böyük marağa səbəb olub. Sosial şəbəkələrdə “#ClubWorldCup2029” həştəqi qısa müddətdə trendə çevrilib. Azarkeşlərin bir qismi turnirin iki ildən bir keçirilməsinin futbolçular üçün əlavə fiziki yük yaradacağını düşünür. Digərləri isə hesab edir ki, bu addım futbolun daha çox regionda inkişafına dəstək ola bilər.
Ekspertlərin fikrincə, nəzərdə tutulan dəyişiklik Avropa və Cənubi Amerika klublarının üstünlüyünü müəyyən qədər azalda, eyni zamanda Asiya və Afrika təmsilçilərinə beynəlxalq arenada daha çox şans verə bilər.
Yeni formatla bağlı yekun qərarın 2026-cı ilin sonuna qədər rəsmi şəkildə açıqlanacağı gözlənilir.
Mənbə: The Guardian, FIFA
Tərcümə etdi: Fatimə Salmanlı
