Süni intellekt getdikcə daha çox sahədə tətbiq olunduğu kimi, film və televiziya sənayesi də bu dəyişiklikdən geri qalmır. Vizual məzmun istehsalında inqilab edən generativ süni intellekt artıq yalnız sınaq layihələrində deyil, əsas platformaların istehsallarında da istifadə olunur. Bu sahədə liderlərdən biri isə Netflix-dir.
Bu yaxınlarda keçirilən bir tədbirdə Netflix-in baş direktoru Ted Sarandos Netflix seriyasındakı ilk generativ süni intellektlə işləyən səhnəni elan edib. Sözügedən istehsal Argentinanın “The Eternaut” elmi-fantastik serialıdır.
Sarandosun sözlərinə görə, Buenos-Ayresdə binanın çökdüyü səhnə tamamilə süni intellekt tərəfindən yaradılıb. Ənənəvi üsullardan istifadə edərək belə vizual effektlərin yaradılması böyük büdcə tələb etdiyi üçün Netflix xərcləri azaltmaq və istehsal prosesini sürətləndirmək üçün bu layihədə süni intellektdən istifadə edib.
Niyə süni intellekt seçilib?
Yüksək keyfiyyətli vizual effektlər, xüsusilə, orta və aşağı büdcəli istehsallar üçün əhəmiyyətli problem yaradıb. "The Eternaut" kimi layihələrdə böyük miqyaslı səhnələri məhdud resurslarla reallaşdırmaq çox vaxt mümkün olmayıb. Bununla belə, generativ süni intellekt texnologiyası bu problemi həll etməyə başlayıb.
Netflix bu texnologiyadan həm xərcləri azaltmaq, həm də yaradıcı qruplara daha çox çeviklik təmin etmək üçün istifadə edib. Sarandosun sözlərinə görə, bu təcrübə təkcə Netflix üçün bir sınaq deyil, həm də onların gələcək istehsal strategiyasının bir hissəsi olacaq mühüm addımdır.
Sənayedə qarışıq reaksiyalar
Media istehsalında süni intellektdən istifadə daha çox aktyorlar, ssenaristlər və vizual effektlər üzrə mütəxəssislər arasında narahatlıq yaradıb. Bu texnologiyaların işçi qüvvəsi üçün yaratdığı təhlükə və yaradıcı əməyin devalvasiyası hələ də sənaye daxilində müzakirə mövzusudur.
Bununla belə, studiyalar üçün generativ süni intellekt bir sıra üstünlüklər təqdim edir:
1. Əvvəlcədən istehsalda sürətli səhnə planlaması;
2. Aşağı qiymətə yüksək keyfiyyətli səhnələr;
3. Proseslərin avtomatlaşdırılması ilə vaxta qənaət.
Bu üstünlüklər süni intellektə əlçatanlığı artırmaqla yanaşı, istehsal keyfiyyətini də yüksəltməyə imkan verir. Bu texnologiyaların Netflix kimi əsas platformalar tərəfindən mənimsənilməsi qısa müddətdə müzakirələrə səbəb olsa da, uzunmüddətli perspektivdə sənaye standartlarını köklü şəkildə dəyişə bilər.
Texnologiya və elmi fantastikanın konvergensiyası
"The Eternaut" argentinalı yazıçı Hector Germán Oesterheldin eyni adlı qrafik romanından uyğunlaşdırılmış elmi fantastika seriyasıdır. Gərgin atmosferi və sosial çalarları ilə diqqət çəkən serial Latın Amerikasının ən mühüm komikslərindən biri hesab olunur.
Netflix-in bu layihədə süni intellektdən aktiv şəkildə istifadə etməsi təkcə texnoloji yenilik deyil, həm də hekayənin distopik xarakterinə uyğun estetik seçim kimi dəyərləndirilə bilər.
Süni intellektə əsaslanan istehsallar geniş yayılacaqmı?
Ted Sarandosun açıqlamaları Netflix-in generativ süni intellektə marağının birdəfəlik təcrübə olmadığını göstərir. Əksinə, bu texnologiya yaxın illərdə aktiv şəkildə istifadə oluna bilər:
1) Xüsusi effektlərin yaradılmasında
2) Virtual səhnə dizaynlarında
3) Xarakter animasiyalarında
4) Avtomatlaşdırılmış “storyboard” istehsalında
Süni intellekt tərəfindən təklif olunan bu yeni imkanlar rəqəmsal məzmun istehsalının gələcəyini formalaşdırmağa hazır görünür. Sarandosun fikrincə, studiyalar sonda bu texnologiyanı mənimsəmək məcburiyyətində qalacaqlar.
Mənbə: Fikrimucit
Tərcümə etdi: Səidə Əsədli
