İngiltərə Çempionluğunun son turunda "İpsviç Taun" doğma meydanı "Portman Road" stadionunda "Kuinz Park Reyncers" (QPR) komandasını qəbul edib. Baş məşqçi Kiran Makkennanın rəhbərlik etdiyi komanda rəqibini məğlub edərək elitaya vəsiqəni təmin edib.
"İpsviç Taun"un futbolçusu Keysi Makatir vurduğu qoldan sonra emosional şəkildə qələbəni qeyd edərkən
24media.az "BBC Sports"a istinadən bildirir ki, bu barədə məlumat beynəlxalq idman mətbuatında, o cümlədən "The Guardian" nəşrində geniş işıqlandırılıb. Bildirilib ki, görüş "İpsviç"in tam üstünlüyü şəraitində keçib və meydan sahibləri azarkeşlərinə unudulmaz qələbə sevinci yaşadıblar.
Matçın gedişatında Corc Hirst və Ceyden Filocen erkən qollarla komandanı önə keçirərək gərginliyi aradan qaldırıblar. Oyunun son dəqiqələrində isə Keysi Makatirin vurduğu üçüncü qol "İpsviç"in 3:0 hesablı parlaq qələbəsini və Premyer Liqaya birbaşa yüksəlişini rəsmiləşdirib.
Tədbir zamanı on minlərlə azarkeş küçələrə axışaraq komandanın bu uğurunu böyük coşğu ilə qeyd edib. Bu nəticə ilə "İpsviç Taun" tam 22 illik fasilədən sonra yenidən İngiltərə futbolunun zirvəsinə geri dönməyi bacarıb.
Klubun növbəti mövsüm üçün transfer planları və Premyer Liqadakı hədəfləri barədə rəsmi açıqlamaların yaxın həftələrdə veriləcəyi gözlənilir.
Fatimə Salmanlı
