İtaliyanın şimalında, Alp dağlarında yerləşən Stelvio Milli Parkında alimlər tərəfindən nadir və son dərəcə əhəmiyyətli bir paleontoloji tapıntı qeydə alınıb. Tədqiqatçılar qayalı dağ yamacında dinozavrlara aid nəhəng ayaq izləri aşkar ediblər. İlkin araşdırmalara əsasən, bu izlərin yaşı təxminən 210 milyon il olaraq qiymətləndirilir və onlar Yer üzündə dinozavrların ilk yayıldığı dövrlərə aid edilir.
Mütəxəssislərin bildirdiyinə görə, tapılan izlər əsasən bitki ilə qidalanan dinozavrlara məxsusdur. Ən diqqətçəkən məqam isə izlərin bir neçə fərqli heyvana aid olması və onların sürü halında hərəkət etdiyini göstərməsi olub. Bu fakt dinozavrların sosial davranışları haqqında elmə yeni və dəyərli məlumatlar qazandırır.
Araşdırma qrupu vurğulayır ki, izlərin bu qədər yaxşı qorunub saxlanması dağlıq ərazi üçün olduqca nadir hal olub. Zamanla baş verən geoloji dəyişikliklər nəticəsində dinozavrların hərəkət etdiyi düzənliklərin bu gün yüksək dağ yamacına çevrildiyi ehtimal olunur. Bu isə Alp dağlarının milyonlarla il ərzində keçdiyi mürəkkəb geoloji prosesləri bir daha sübut edir.
Alimlər tapıntının beynəlxalq elmi ictimaiyyət üçün böyük maraq doğurduğunu bildirir və ərazidə əlavə tədqiqatların aparılmasının planlaşdırıldığını qeyd edirlər. Bu kəşf, İtaliyanın təkcə tarixi və mədəni irsi ilə deyil, həm də qədim təbiət tarixi ilə zəngin olduğunu bir daha nümayiş etdirir.
Mənbə: News.sky.com
Tərcümə etdi: Aylin Bayraməliyeva
