Süni intellekt sahəsində fəaliyyət göstərən OpenAİ cihaz istehsalı ilə məşğul olan "io" adlı startapı 6.5 milyard dollar dəyərində satın alıb. Bu strateji satınalmadan sonra məşhur Apple dizayneri Joni Ayv OpenAİ-nin dizayn işlərinə rəhbərlik edəcək.
OpenAİ-nin baş direktoru Sam Altman bu barədə platforma “X” üzərindən paylaşım edərək, Joni Ayv ilə əməkdaşlığa başladığı üçün həyəcanlı olduğunu bildirib:
“Joni ilə əməkdaşlıq etməkdən məmnunam. Məncə, o, dünyanın ən böyük dizayneridir. Yeni nəsil süni intellekt əsaslı kompüterlər yaratmağa çalışmaq bizi çox həyəcanlandırır".
Joni Ayv-ın OpenAİ-yə qoşulması onu birbaşa keçmiş iş yeri olan Apple ilə rəqabətə salır. Xatırladaq ki, Ayv Apple-da çalışdığı dövrdə iPhone və Apple Watch kimi məhsulların dizaynında əsas fiqurlardan biri olub. Hazırda həm Apple, həm də OpenAİ süni intellekti cihazlara inteqrasiya etmək uğrunda mübarizə aparır.
Mənbə: Techcrunch
Tərcümə etdi: Zeynəb Yunuszadə
