İndoneziyadakı meşə yanğınlarından yayılan tüstü və dumanın güclənməsi fonunda Sinqapurda çirklənmə səviyyəsi kəskin artıb, Şərqi Timor isə məktəbləri bağlayıb.
24media.az Reuters-ə istinadən xəbər verir ki, çərşənbə günü Sinqapurda çirklənmə göstəriciləri ilin ən yüksək səviyyəsinə çatıb. Eyni zamanda Şərqi Timor, İndoneziyadakı meşə yanğınlarından yayılan tüstü və dumanın artması səbəbindən məktəbləri üç gün müddətinə bağlayıb.
Sinqapurun ada dövlətinin qərb hissəsində PM2.5 hissəciklərinin bir saatlıq konsentrasiyası kubmetr üçün 284 mikroqramadək yüksələrək, cari duman dövründə ilk dəfə Milli Ətraf Mühit Agentliyinin təsnifatına görə "çox yüksək" səviyyəyə çatıb.
Şərqi Timor hökuməti bəyanatında bildirib ki, "qonşu region və ya ölkələrdəki meşə yanğınlarından yayılan çirkləndirici hissəciklər" səbəbindən oktyabrın 15-dən etibarən üç gün müddətinə əyani tədris prosesi dayandırılır.
Şərqi Timor açıq şəkildə İndoneziyanın adını çəkməsə də, ölkə İndoneziyanın bir sıra yanğın ocaqlarının qeydə alındığı Şərqi Nusa-Tengqara əyalətinin bir hissəsi ilə eyni adanı bölüşür.
İndoneziya "El-Nino" ilə əlaqəli quraq hava şəraiti səbəbindən son 11 ilin ən şiddətli meşə yanğınları mövsümü ilə mübarizə aparır. Yaranan duman ölkə daxilində tənəffüs yolu xəstəliklərinin artmasına və regionda hava keyfiyyətinin kəskin pisləşməsinə səbəb olub. Nəticədə Malayziyanın bir sıra ştatlarında da məktəblər bağlanmaq məcburiyyətində qalıb.
2015-ci ilin oktyabrında İndoneziyadakı meşə yanğınları Sinqapurun qərbində PM2.5 səviyyəsini kubmetr üçün 471 mikroqramadək yüksəldərək milli rekord həddə çatdırmışdı.
Ətraf Mühit Nazirliyinin məlumatlarına görə, çərşənbə günü Mərkəzi Kalimantan əyalətində İndoneziyanın ISPU hava çirkliliyi indeksi 1200-ü keçib ki, bu da "təhlükəli" hesab edilən 300 səviyyəsindən dörd dəfə yüksəkdir.
Yerli xəbər kadrlarında Mərkəzi Kalimantanın Palangka Raya şəhərinin qalın sarı dumanla örtüldüyü və bunun sürücülər üçün görmə məsafəsini minimuma endirdiyi əks olunub. Həmçinin polis əməkdaşlarının yol kənarındakı torf yanğınlarını su şırnaqları ilə söndürməyə çalışdıqları müşahidə edilib.
Aygül Alıyeva
