20 ildən artıq Fernando Alonsonun meneceri olan Flavio Briatore ispan pilotun karyerası haqda danışıb.
Flavio Briatore bildirib ki, o, Aston Martin komandasının sürücüsü Fernando Alonsonun F1 2026 mövsümünün sonunda Formula 1-dən istefa verəcəyini gözləyir. Alonso həmin ildən sonra davam edib-etməyəcəyinə qərar verəcək.
Alonso, 2001-ci ildə Minardi ilə başlayan karyerasında 391 Qran Prisə start verən F1 tarixinin ən təcrübəli sürücülərindəndir. İki illik fasilədən sonra 2021-ci ildə F1-ə qayıdan ikiqat Dünya Çempionu ötən ay 43 yaşını qeyd edib.
Aston Martin aprel ayında Alonso ilə onu ən azı 2026-cı il mövsümünün sonuna qədər komandada saxlayacaq yeni çoxillik müqaviləyə razılaşdığını açıqlamışdı. 2026-cı il mövsümü idmanda yeni qaydaların və Aston Martin-in Honda ilə yeni əməkdaşlığının başlanğıcı olacaq.
Alonso 2005/06-cı illərdə Renault-da ardıcıl titullar qazananda komandanın rəhbəri olan Briatore iyirmi ildən artıqdır ki, Alonsonun meneceri olub və onun yaxın sirdaşı kimi tanınır. Formula For Success podkastında görünən və iyun ayında Renault-a idarə məsləhətçisi kimi qayıdan Briatore, Alonsonun hazırkı vəziyyətdə 2026-cı ilin sonunda təqaüdə çıxma ehtimalının olduğunu açıqlayıb.
Açıqlamasında Aston Martin-in 2026-cı ildən sonra davam etmək üçün seçimləri olduğunu bildirən Briatore, Alonsonun həmin mövsümün sonunda "bir il davam edib-etməmək" mövzusunda böyük bir qərar verəcəyinə işarə verib.
Mənbə: Motorsport
Tərcümə etdi: Məhəmməd Qasımov
