Apple 98 ölkədəki iPhone istifadəçilərinə casus proqram hücumları barədə xəbərdarlıq edib. Son xəbərdarlıq bu ilin ikinci xəbərdarlığı olub. Ötən aprel ayında 92 ölkədəki istifadəçilər oxşar bildiriş alıblar.
Apple bu bildirişləri 2021-ci ildən bəri müntəzəm olaraq göndərir və 150-dən çox ölkədə istifadəçilərə çatır.
Çərşənbə günü dərc edilən son xəbərdarlıqlarda hücum edənlərin kimliyi və ya istifadəçilərin bildirişləri aldığı ölkələr haqqında ətraflı məlumat verilməyib.
“Apple, Apple ID-nizlə əlaqəli iPhone-unuzu uzaqdan pozmağa cəhd edən pullu casus proqram hücumuna məruz qaldığınızı aşkar etdi” deyə şirkət təsirlənmiş müştərilərə göndərdiyi xəbərdarlıqda bildirib.
Bu hücum çox güman ki, kim olduğunuza və ya nə etdiyinizə görə sizi hədəfləyir. "Bu cür hücumları aşkar edərkən mütləq əminliyə nail olmaq heç vaxt mümkün olmasa da, Apple bu xəbərdarlığa çox arxayındır, lütfən, bunu ciddi qəbul edin."
Hindistan təhdid bildirişləri alan ölkələr sırasındadır
İstifadəçi ifadələrinə görə, Hindistandakı istifadəçilər Apple-ın son təhdid bildirişlərini alanlar arasındadır.
Apple oktyabr ayında ölkədəki bir çox jurnalist və siyasətçilərə oxşar xəbərdarlıqlar göndərib.
İnsan haqlarını müdafiə edən Amnesty İnternational qrupu daha sonra bildirib ki, İsrailin NSO Group şirkəti tərəfindən hazırlanmış yüksək aqressiv casus proqram olan Pegasus-un Hindistanın tanınmış jurnalistlərinin iPhone-larında olduğunu aşkar edib.
Təsirə məruz qalan istifadəçilərə etdiyi bildirişdə Apple təhlükənin müəyyən edilməsi üsullarının həssas xarakterini vurğulayıb və əlavə təfərrüatların açıqlanmasının təcavüzkarların gələcəkdə aşkarlanmasından qaçmasına kömək edə biləcəyini söyləyib.
Apple keçən ildən bəri istifadə etdiyi dildə də əhəmiyyətli dəyişiklik edərək, bu hadisələri daha əvvəl istifadə edilən “dövlət tərəfindən dəstəklənən” hücumlar deyil, “ödənişli casus proqram hücumları” kimi təsvir etməyi seçib.
Mənbə: TRT Haber
Tərcümə etdi: Aminə Paşazadə
