İspaniya brendi "Zara" vizual kontentin yaradılmasında süni intellekt (Sİ) texnologiyalarını tətbiq etməyə başlayıb. Yeni sistem brendə modellərin görüntülərini rəqəmsal şəkildə dəyişməyə və fərqli üslubları sınaqdan keçirməyə imkan verir.
Bu texnologiya sayəsində "Zara" artıq eyni model fotosu üzərində geyimlərin rəngini, fakturasını, stilini və ümumi vizual görünüşünü dəyişə bilir. Beləliklə, fərqli kampaniyalar və onlayn platformalar üçün yeni şəkillər yaratmaq məqsədilə təkrar fotosessiyalara ehtiyac qalmır. Bu isə həm istehsal prosesini sürətləndirir, həm də xərcləri əhəmiyyətli dərəcədə azaldır.
Brendin açıqlamasına görə, süni intellekt xüsusilə onlayn satış platformaları üçün böyük üstünlük yaradır. "Zara" trendlərdə baş verən dəyişikliklərə daha tez reaksiya verə, mövsüm ərzində vizual materialları operativ şəkildə yeniləyə bilir. Eyni zamanda, bu sistem kolleksiyaların təqdimatında daha çevik və yaradıcı yanaşmaya şərait yaradır.
Ekspertlər qeyd edirlər ki, "Zara"nın bu addımı moda sənayesində rəqəmsallaşmanın və texnologiya ilə dizaynın inteqrasiyasının sürətləndiyini göstərir. Süni intellektdən istifadə həm brendlərin rəqabət qabiliyyətini artırır, həm də davamlılıq baxımından əhəmiyyətlidir, çünki əlavə çəkilişlər və resurs istifadəsi azalır.
Mənbə: timesofindia.indiatimes.com
Tərcümə etdi: Şehrin Musayeva
