Hər il minlərlə gənc ali məktəblərə qəbul imtahanı zamanı yalnız test sualları ilə deyil, ciddi psixoloji təzyiqlərlə də üz-üzə qalır. Onlar üçün bu sadəcə bir imtahan yox, bütün gələcəklərinin ölçüldüyü kritik bir gündür.
Psixoloqlar bildirirlər ki, abituriyentlər arasında təzyiq, həyəcan, özünəinam itkisi və qorxu halları bu dövrdə kəskin artır. Bəzi gənclər nəticəyə görə özlərini dəyərsiz hiss edir, bəziləri isə ailənin və cəmiyyətin gözləntilərini qarşılaya bilməyəcəyindən ehtiyat edir.
Ən çox rast gəlinən hallar arasında gecə yuxusuzluğu, daim narahatlıq hissi, sosial təcrid və özünü başqaları ilə müqayisə etmək önə çıxır. Mütəxəssislər bu vəziyyətin qarşısını almaq üçün ailələrin daha çox emosional dəstək göstərməsini, gənclərlə açıq dialoq qurulmasını və nəticənin deyil, səyin önə çəkilməsini tövsiyə edir.
Hazırda bu dövrü yaşayan abituriyentlər üçün psixoloji dəstək xətlərinin daha əlçatan olması da vacib amillərdən biri kimi vurğulanır.
Hazırladı: Gülay Bədirli
