Pentaqon süni intellektin (AI) hərbi proseslərdə əhəmiyyətli üstünlük yaratdığını açıqlayıb. Müdafiə Nazirliyi təhlükələrin müəyyən edilməsi, izlənilməsi və qiymətləndirilməsində süni intellektdən istifadə edərək əməliyyatların sürətini artırır.
Pentaqonun Rəqəmsal və Süni İntellekt üzrə Baş Zabit Dr. Radha Plumb TechCrunch-a müsahibəsində bildirib ki, "Biz komandirlərimizin təhlükələrə vaxtında reaksiya verə bilməsi üçün "kill chain" icrasını sürətləndirmək yollarını inkişaf etdiririk".
"Kill Chain" nədir?
"Kill chain" hərbi əməliyyatlarda təhlükələrin müəyyən edilməsi, izlənilməsi və aradan qaldırılması prosesinə verilən addır. Bu proses mürəkkəb sensorlar, platformalar və silah sistemlərini əhatə edir. Süni intellekt, xüsusilə generativ modellər, planlaşdırma və strategiya mərhələlərində böyük rol oynayır.
Hazırda süni intellekt alətləri birbaşa silah kimi istifadə olunmasa da, Müdafiə Nazirliyi AI-nin təhlükəsizlik əməliyyatlarında böyük potensiala sahib olduğunu vurğulayıb. Dr. Plumb, bu texnologiyanın insanları öldürmədən hərbi qüvvələri daha effektiv hala gətirəcəyini qeyd edib.
Süni intellekt sahəsində OpenAI və Anthropic kimi şirkətlər də Pentaqonla əməkdaşlıq edərək mürəkkəb texnologiyaları hərbi sahəyə tətbiq etmək üçün çalışırlar. Bu əməkdaşlıqlar ABŞ ordusunun təhlükəsizlik tədbirlərini gücləndirmək məqsədi daşıyır.
Mənbə: Techcrunch
Tərcümə etdi: Zeynəb Yunuszadə
