2025-ci ilin yanvar ayı, səma həvəskarları üçün unikal və nadir bir astronomik hadisə təqdim edir. Yanvarın 25-də altı parlaq planet – Venera, Mars, Yupiter, Saturn, Uran və Neptun – gecə səmasında xüsusi düzülüş təşkil edəcək. Bu hadisə “planet paradı” kimi tanınır və dünyanın müxtəlif bölgələrindən görünəcək.
Planetparadı nədir?
“Planet paradı” zamanı planetlər Yerdən görünüşünə əsasən, səmanın ekliptik adlanan xətti boyunca düzülür. 2025-ci ilin yanvarındakı bu hadisə Venera, Mars, Yupiter, Saturn, Uran və Neptunun müəyyən yaxınlıqda görünməsini təmin edəcək.
Bu hadisəni xüsusi edən amillər:
Nadirlik: Planetlərin bu şəkildə düzülüşü nadir hallarda baş verir.
Unikal vizual təcrübə: Hətta teleskopsuz müşahidə edilə bilən planetlər (Venera, Mars, Yupiter və Saturn) parlaq şəkildə görünəcək.
Planetləri necə və nə zaman görmək olar?
1) Venera və Saturn:
Görünmə vaxtı: Günəş batdıqdan dərhal sonra.
Xüsusiyyətlər: Parlaq işığı ilə Venera ən asan görünən planet olacaq. Saturn isə onun yanında daha solğun parlayacaq.
Əsas hadisə: Yanvarın 17-18-də bu iki planet “qovuşma” yaşayacaq, yəni səmada bir-birinə çox yaxın görünəcək.
2)Yupiter:
Görünmə vaxtı: Gün batımından sonra.
Təsvir: Parlaq bir ulduz kimi görünəcək. Teleskop vasitəsilə Yupiterin dörd böyük peykini müşahidə etmək mümkündür.
3)Mars:
Görünmə vaxtı: Yanvarın 17-dən 25-dək hər axşam.
Xüsusiyyətlər: Qırmızı rəngi ilə asanlıqla tanına bilər.
4)Merkuri:
Görünmə vaxtı: Gün batımına yaxın qısa müddət üçün.
Çətinliklər: Günəşə yaxın olduğu üçün görünməsi daha çətin olacaq.
5)Uran və Neptun:
Görünmə şərtləri: Teleskop və ya güclü durbinlərdən istifadə etmədən görünməz.
Maraqlı fakt: Neptunun mavi rəngini teleskopla aydın şəkildə müşahidə etmək mümkündür.
Planetləri necə və nə zaman müşahidə etmək olar?
Yerləşmə: Geniş üfüq mənzərəsi olan açıq ərazilər seçin. Şəhər işıqlarından uzaq ərazilər daha yaxşı görünüş təmin edəcək.
Vaxt: Günəş batdıqdan dərhal sonra planetlər daha yaxşı görünəcək. Ən parlaq planetlər olan Venera, Mars və Yupiter ilk görünəcək.
Hava Şəraiti: Aydın səma gecələri müşahidə üçün mükəmməldir.
NASA-nın rəyi
NASA planet paradlarını unikal, lakin nizamlı bir səma hadisəsi kimi təsvir edir. Planetlərin hamısı ekliptik müstəvi boyunca hərəkət etdiyindən, müəyyən dövrlərdə onların düzülməsi qaçılmazdır. Bununla belə, bu düzülüşlər hər dəfə fərqli görünür və müşahidəçilərə müxtəlif səma mənzərələri təqdim edir.
2025-ci ilin yanvarında baş verəcək "planet paradı" astronomiya həvəskarları və adi müşahidəçilər üçün unudulmaz bir təcrübə olacaq. Bu nadir hadisəni qaçırmamaq üçün müşahidə avadanlıqlarınızı hazırlayın və açıq səma altında bu möhtəşəm səma tamaşasının şahidi olun!
Mənbə: Fikrimucit
Tərcümə etdi: Səidə Əsədli
