Colossal Biosciences şirkəti nəsli kəsilmiş növləri dirçəltmək üçün ciddi addımlar atır. ABŞ-ın bu biotexnologiya şirkəti, mamontlar, Tasmanian pələngi (thylacine) və dodo quşu kimi heyvanların genetik dirçəldilməsi layihələrini həyata keçirmək məqsədilə, 200 milyon dollarlıq "C Seriyası" investisiya raundunu uğurla başa çatdırıb. Bu investisiya ilə şirkətin ümumi dəyəri 10,2 milyard dollara çatıb.
Colossal Biosciences iki il əvvəl 1,5 milyard dollarlıq investisiya cəlb etmişdi. Şirkət bu müddət ərzində vacib elmi uğurlar qazandığını və əsas layihələrini plana uyğun şəkildə davam etdirdiyini bildirib.
Şirkət bildirib ki, nəsli kəsilmiş heyvanların dirçəldilməsi ilə bağlı üç əsas layihə — mamont, Tasmanian pələngi və dodo quşu üzərində işlər 2028-ci ilə qədər tamamlanacaq. Bu layihələr hazırda gəlir gətirməsə də, investorlar bu elmi və texnoloji nailiyyətlərin gələcəkdə böyük potensiala malik olduğuna inanırlar.
Colossal Biosciences-in bu cəsarətli təşəbbüsü, elm və biotexnologiyanın inkişaf perspektivləri baxımından böyük maraq doğurur. Şirkət, genetik modifikasiya və müasir texnologiyalardan istifadə edərək, nəsli kəsilmiş tarixi növləri yenidən təbiətə qaytarmağı qarşısına məqsəd qoyub.
Mənbə: Techcrunch
Tərcümə etdi: Zeynəb Yunuszadə
