İsrail ordusunun Qəzza zolağına yönələn hücumları nəticəsində ölənlərin sayı artmaqda davam edib. Qəzzadakı Fələstin Səhiyyə Nazirliyi son rəsmi statistik məlumatları açıqlayıb. Verilən məlumatlara görə, münaqişənin humanitar nəticələri bölgədə ciddi narahatlıq doğurur.
Nazirliyin bildirdiyinə görə, son 48 saat ərzində həyata keçirilən hücumlar nəticəsində 3 nəfərin cəsədi xəstəxanalara çatdırılıb, 9 nəfər isə yaralanıb. Atəşkəsin qüvvəyə minməsindən sonra baş verən hücumlarda 442 nəfər həlak olub, 1236 nəfər yaralanıb. 2023-cü ilin oktyabrından bəri Qəzza zolağında həyatını itirənlərin ümumi sayı 71 min 412-yə, yaralıların sayı isə 171 min 314-ə çatıb.
Beynəlxalq vasitəçilərin iştirakı ilə Misirdə aparılan danışıqlar nəticəsində atəşkəs və əsir mübadiləsi ilə bağlı razılaşma əldə olunub. Razılaşma İsrail hökumətinin təsdiqindən sonra oktyabrın 10-da qüvvəyə minib. Lakin atəşkəsə baxmayaraq, bölgədə təhlükəsizliklə bağlı gərginlik hələ də davam edib.
Mənbə: TRT Haber
Tərcümə etdi: Fidan Mənsimova
