Vaxt idarəetməsi, əsasən, seçimlər üzərində qurulur, məsələn, sən qərar verirsən ki, nəyi etməlisən, nə vaxt tamamlamalısan və məqsədlərinə çatmaq üçün hansı vəzifələri yerinə yetirməlisən.
Əgər sən yüksək dəyərə malik, məqsədyönümlü işləri prioritet hesab edib vaxtında bitirir, eyni zamanda, sağlam həyat üçün də vaxt ayırırsansa, deməli, vaxtını uğurla idarə etməyi bacarırsan.
Bəs bunu necə etmək olar?
Cavab sadədir. düzgün vaxt idarəetmə texnikalarından istifadə etməklə.
Vaxt idarəetmə texnikaları sənin daha məhsuldar və effektiv işləməyin, daha sürətli və doğru qərarlar verməyin, həmçinin az vaxt və az enerji sərf etməklə daha çox iş görməyin üçün riayət etməli olduğun qayda və prinsiplər toplusudur.
Vaxt idarəetmə üsulları
Vaxt idarəetmə təcrübələrinə əsaslanan çoxlu texnikalar mövcuddur. Bunlardan bəziləri belədir:
•Gündəlik görəcəyin işləri kağıza yazmaq.
•Əvvəlcə, vacib və təcili işləri yerinə yetirmək.
•Prioritet işlərə, rutin işlərə və fasilələrə vaxt ayırmaq.
•Stresi düzgün idarə etmək.
•Komanda işini səmərəli təşkil etmək.
•Layihələrin gedişatını izləmək və gecikmələri müəyyən etmək.
Bu texnikaların çoxu yuxarıdakı məqamlarla bağlıdır. Sən öz gündəlik rutinində hansı sahələri inkişaf etdirmək istədiyini müəyyən edib ona uyğun texnikaları seçə bilərsən.
Bundan əlavə, vaxt idarəetmə bacarıqlarını da inkişaf etdirmək, həmçinin şəxsi vaxt idarəetmə stilini nəzərə almaq vacibdir. İşə aid olan xüsusi texnikaları seçərək iş günlərini də daha yaxşı təşkil etmək mümkündür.
Effektiv vaxt idarəetmə bacarıqları
•SMART məqsədlərin qoyulması-məqsədlərin konkret (Specific), ölçülə bilən (Measurable), əldə edilə bilən (Attainable), əlaqəli (Relevant) və vaxtla məhdudlaşan (Time-bound) olmasına diqqət yetirmək.
•Effektiv planlaşdırma-aydın məqsədlər, konkret vəzifələr və resursların müəyyənləşdirilməsi əsasında dəqiq plan hazırlamaq.
•Stress idarəetməsi-iş zamanı daha rahat olmaq üçün stress azaldan üsul və taktikaları tətbiq etmək.
•Vəzifələrin düzgün bölüşdürülməsi- iş yükünü bacarıqlı əməkdaşlar arasında paylaşmaq.
•Diqqət yayındırıcı amillərdən qaçmaq- iş zamanı və ya istirahət edərkən vaxt itirməmək üçün yayındırıcıları minimuma endirmək.
•Tək işə fokuslanmaq- eyni anda çox iş görməkdən fərqli olaraq, bir işə tam diqqət vermək daha keyfiyyətli nəticə verir.
•“Yox” deməyi bacarmaq-öz prioritetlərinə daha çox vaxt ayırmaq üçün lazım gəldikdə xeyir demək.
•Prioritetləri müəyyənləşdirmək-vaxtını düzgün işlərə sərf etmək daha az enerji tələb edir və daha yaxşı nəticə verir. Bu, Pareto prinsipi və ya 20/80 qaydası kimi də tanınır.
•Təxirə salmanı aradan qaldırmaq- təxirə salma səbəblərini müəyyən edib onlarla mübarizə aparmaq.
Vaxt idarəetməni təkmilləşdirmək üçün bu bacarıqları davamlı məşq etmək vacibdir. Düzgün vaxt idarəetmə təkcə işdə yox, həm də həyatın digər sahələrində-təhsil, şəxsi inkişaf və sağlamlıqda uğur gətirir.
Mənbə: Clockify
Tərcümə etdi: Arzu Qafarova
