Afrika vəhşi itləri partnyor tapmaq üçün Zambiyada təxminən 4 min kilometr yol qət ediblər. "Ecology" elmi jurnalında dərc olunan araşdırma bu heyvanların həyatına dair mühüm məlumatlar ortaya qoyub.
24media.az aroundprague.cz saytına istinadən xəbər verir ki, alimlərin hesablamalarına görə, hazırda təbiətdə təxminən 6 min Afrika vəhşi iti qalıb. Onlar sürülər halında yaşayır və birlikdə ov edirlər. Bu heyvanlar öz sürülərində çoxala bilmədikləri üçün iki-üç yaşlarında partnyor tapmaq məqsədilə başqa sürülərə yollanırlar.
Tədqiqatçılar eyni zamanda üç dişi vəhşi itin hərəkətini də izləyiblər. Onlardan ikisi yol boyunca tələf olub, biri isə brakonyerlərin qurduğu tələyə düşüb. Alimlər bildirirlər ki, qanunsuz tələlər bu heyvanlar üçün ciddi təhlükədir.
Alimlərin fikrincə, vəhşi itlərin çətin ərazilərdən və müxtəlif maneələrdən keçməsi Şərqi və Cənubi Afrikadakı ayrı-ayrı heyvan populyasiyalarının bir-biri ilə əlaqədə qala biləcəyini göstərir. Bu, insanların təbiətə artan təsirinə baxmayaraq mümkündür.
Araşdırma qorunan əraziləri birləşdirən təbii dəhlizlərin əhəmiyyətini də vurğulayır. Bu ərazilər bəzən yollar, şəhərlər və kənd təsərrüfatı sahələri ilə bir-birindən ayrılır.
Təbiəti qoruyan mütəxəssislər bildirirlər ki, geniş qorunan əraziləri bir-birindən ayrı yerlər kimi qiymətləndirmək olmaz. Uzun məsafələr qət edən heyvanların sağ qalması üçün bir-biri ilə əlaqəli təbii ərazilər lazımdır.
Aysel Mehtizadə
