İranın cənubunda ABŞ-yə məxsus "F-15E Strike Eagle" tipli döyüş təyyarəsinin vurulduğu bildirilir. Hadisə nəticəsində ekipaj üzvlərindən biri xilas edilsə də, digər pilotun taleyi hələ də naməlum olaraq qalır.
ABŞ-yə məxsus "F-15 Eagle" təyyarəsi (arxiv fotosu)
ABŞ mediasına istinadən yayılan məlumatlara görə, xilas edilən pilot təhlükəsiz şəkildə bölgədən çıxarılıb. Digər ekipaj üzvünün isə silah sistemlərinə cavabdeh şəxs olduğu və onun tapılması üçün genişmiqyaslı axtarış əməliyyatlarının davam etdiyi qeyd olunur.
İran təhlükəsizlik qüvvələri hadisənin baş verdiyi ərazidə əməliyyatları gücləndirib və yerli əhaliyə itkin pilotun tapılması üçün çağırış edilib. Rəsmi qurumlar tərəfindən bu istiqamətdə məlumat verənlərə mükafat vəd olunduğu bildirilir.
Eyni zamanda, İran tərəfi axtarış əməliyyatlarına cəlb edilən "A-10 Thunderbolt II" tipli digər ABŞ hərbi təyyarəsinin də Körfəz üzərində vurulduğunu iddia edib. Məlumata görə, həmin təyyarənin pilotu katapult vasitəsilə xilas olub.
Hərbi ekspertlərin fikrincə, "F-15E Strike Eagle" təyyarəsi ehtimal ki, yer-hava tipli raketlərlə vurulub. Bu cür raketlər təyyarənin istilik izini izləyərək hədəfi məhv etməyə qadirdir və müdafiə tədbirləri hər zaman effektiv olmaya bilər.
Analitiklər bildirirlər ki, İranın bu cür hücum imkanlarına malik olduğu əvvəldən məlum olub və münaqişənin uzanması fonunda belə bir hadisənin baş verməsi gözlənilən olub. Bununla belə, ABŞ üçün bir təyyarənin itirilməsi ümumi hərbi əməliyyatların gedişinə həlledici təsir göstərməyəcək.
İran rəsmiləri hadisəni siyasi baxımdan da qiymətləndirərək, bunu özləri üçün mühüm uğur kimi təqdim ediblər. Yerli hakimiyyət nümayəndələri isə əsas məqsədlərinin ABŞ ekipaj üzvlərini “canlı ələ keçirmək” olduğunu açıqlayıb.
Qeyd edək ki, bu, son dövrlərdə regionda baş verən ilk belə hadisə deyil. Daha əvvəl də müxtəlif bölgələrdə ABŞ hərbi aviasiyasına aid itkilər qeydə alınıb.
Emiliya Vəlicanova
