Tramp gərginliyi artırmaqdan geri çəkilib, amma İran müharibəsi davam edir. Tehran birbaşa danışıqları təkzib edib və bildirib ki, Trampın enerji stansiyalarına hücumu təxirə salması enerji qiymətlərini azaltmaq və hərbi planları üçün vaxt qazanmaq məqsədi daşıyır.
Bazar günü Tehranın mərkəzində insanlar İran hökumətini dəstəkləyən nümayişdə bayraqlar dalğalandırırlar.
"24media.az" "NBC.news"a istinadən bildirir ki, İranda müharibənin daha da böyüməsi gözlənilirdi, amma indi ehtimal olunur ki, bu proses müharibəni bitirə biləcək bir razılaşmaya doğru gedə bilər. Bu dəyişiklik Trampın sosial mediada verdiyi açıqlamadan sonra ortaya çıxıb.
Tramp bazar ertəsi deyib ki, İranın enerji obyektlərinə planlaşdırılan hücumlar ən azı 5 gün təxirə salınır. Bu qərar İranın Hörmüz boğazını yenidən açması üçün verilən son müddətdən az əvvəl verilib. O həmçinin deyib ki, ABŞ və İran arasında müharibəni tam bitirmək üçün məhsuldar danışıqlar gedir. Amma İran bunu inkar edir və deyir ki, heç bir birbaşa danışıq yoxdur. Müharibə artıq 4 həftədir davam edir. Bu münaqişə Yaxın Şərqdə vəziyyəti gərginləşdirib, enerji və ərzaq qiymətlərini artırıb və dünya iqtisadiyyatı üçün təhlükə yaradıb. Trampın qərarı daha böyük gərginliyi müvəqqəti olaraq gecikdirsə də, bundan dərhal sonra İsrail Tehranın mərkəzinə yeni zərbələr endirib.
ABŞ və İsrailin fevralın 28-də başlatdığı müharibə davam edir. İran isə Hörmüz boğazına nəzarəti saxlayır və bu da dünya neftinin böyük hissəsinin daşınmasına təsir edir. Beynəlxalq Enerji Agentliyinin rəhbəri xəbərdarlıq edib ki, vəziyyət 1970-ci illərin neft böhranından və Ukrayna müharibəsinin təsirindən daha ciddi ola bilər. Tramp əvvəlcə İrana 48 saat vaxt verib ki, boğazı açsın. Əks halda enerji obyektlərinə hücum ediləcəyini deyib. İran isə geri çəkilməyib və əksinə, regiondakı enerji və su obyektlərinə zərbə endirə biləcəyini bildirib.
İran isə sahildən hücum olarsa, Fars körfəzini bağlaya və minalaya biləcəyini deyir. Tramp bildirib ki, İran ABŞ-lə əlaqə saxlayaraq razılaşma əldə etmək istəyir. O deyib ki, əsas məsələlərdən biri İranın nüvə silahı əldə etməməsidir. ABŞ rəsmiləri də bildirirlər ki, lazım gələrsə, bütün variantlar istifadə oluna bilər. Ekspertlər isə deyirlər ki, bu vəziyyət ya müharibəni bitirə, ya da daha böyük hərbi əməliyyatlar üçün vaxt qazanmaq məqsədi daşıya bilər. Hazırda vəziyyətin necə inkişaf edəcəyi hələ məlum deyil.
Banuçiçək Qurbanova
