Məşhur müğənni Britni Spirs Kaliforniya ştatında alkoqol və narkotik təsiri altında avtomobil idarə etmək şübhəsi ilə saxlanılıb.
24Media.az BBC-yə istinadən bildirir ki, müğənni çərşənbə günü yerli vaxtla saat 21:30 radələrində (05:30 GMT) Kaliforniya Yol Patrulu (CHP) əməkdaşları tərəfindən saxlanılıb. Onun nümayəndəsi BBC-yə açıqlamasında bildirib: “Bu, təəssüf doğuran və tamamilə qəbuledilməz bir hadisədir”.
CHP-nin məlumatına görə, Spirsin idarə etdiyi BMW markalı avtomobil magistral yolda “yüksək sürətlə və qeyri-sabit şəkildə hərəkət etdiyi” üçün polisə bildirilib. O, saxlanıldıqdan sonra “sərxoşluq əlamətləri göstərib” və bir neçə ayıqlıq testindən keçib.
Müğənni cümə axşamı səhər tezdən həbsdən azad edilib və 4 may tarixində Ventura dairəsi Ali Məhkəməsində məhkəmə qarşısına çıxacağı gözlənilir.
Spirsin nümayəndəsi BBC-yə bildirib: “Britni qanuna əməl etmək üçün düzgün addımlar atacaq və ümid edirik ki, bu hadisə onun həyatında çoxdan lazım olan dəyişikliklərin başlanğıcı olacaq”.
Açıqlamada həmçinin qeyd olunub: “Ümid edirik ki, bu çətin dövrdə o, ehtiyac duyduğu kömək və dəstəyi ala biləcək. Oğulları onunla vaxt keçirəcək və yaxınları onun rifahı üçün daha sağlam və uğurlu gələcək planı hazırlayacaqlar”.
CHP-nin bildirdiyinə görə, hadisə ilə bağlı araşdırma davam edir və kimyəvi testlərin nəticələri hələ açıqlanmayıb.
Məlumata əsasən, Spirs ABŞ-nin 101 nömrəli avtomagistralında cənub istiqamətində qara rəngli BMW 430i markalı avtomobili ilə tək hərəkət edirdi. Polis əməkdaşları onu həmin magistralda saxlayıblar.
Həbs qeydlərinə görə, hadisədən sonra onun avtomobili cərimə meydançasına aparılıb. Rəsmi sənədlərdə isə onun peşəsi “məşhur şəxs” kimi göstərilib.
Emiliya Vəlicanova
